中環出更：「Ｋ金大王」娶新抱潮人到賀
有「Ｋ金大王」外號嘅胡良利珠寶行總裁胡楚南日前娶大新抱，在中環四季酒店筵開三十席，珠寶業界人士及一眾潮州冷齊到賀。當晚胡楚南特別開心，事關大仔胡智偉（Edwin）做咗鑽石王老五多年，介紹過好多女仔畀佢都唔啱心水，眼見二、三仔均已成家立室，所以特別心急，但依家終於恨到喇，趕及搭蛇年尾班車。弟弟胡智翔更於婚宴上演唱情歌送贈一對新人，祝願永結同心。
新娘同胡家緣分早結
講到娶新抱，原來新娘蔡凌（Cindy）同胡家早就結下緣分。話說胡楚南多年來曾資助不少優秀舞蹈學生升學，而身為上海舞蹈老師嘅Cindy六歲時已在台上見過未來老爺，沒想到年幾前經友人介紹下，與Edwin約會，結果一見鍾情，拍拖一年多後終成為胡家新抱。難怪胡楚南話，杯新抱茶分外甜，仲講到明想盡快抱孫，而佢對新抱嘅評價亦好高，話跳舞女仔捱得苦，反應快，好適合做胡家新抱喎。
當晚有多名潮人到賀，包括陳偉南、陳幼南、許學之、葉振南、陳有慶及堂侄胡劍江，而珠寶設計師陳曼芝（Gigi）、六福集團副主席謝滿全、發展局局長陳茂波夫婦等都有出席。其中Gigi同胡家相識十多年，睇住新郎成長，佢話好欣賞新郎先打拚事業再成家立室嘅成熟思想。講到送禮，男家金銀珠寶多的是，所以Gigi就唔送珠寶喇，反而花心思以新人樣貌設計一幅作品，並題字祝福佢地馬上有喜。
卓妮同場仲見到長實執董趙國雄，見佢笑容滿面，原來屬虎嘅佢上網睇過馬年運程，話自己運勢強勁，無論人緣、心情、財運各方面都唔錯，如果好好利用嘅話，將會係一個投資年喎。
卓妮