仲有幾日就過年，應節動作之一當然係搞衞生啦，正所謂咯喎，年廿八，洗邋遢。
今日就係年廿八嘞，大家洗咗邋遢未呢？如果未，功夫茶建議大家身體力行，順便做埋另一個應節動作：賣懶，賣懶，賣到年三十晚！
洗邋遢確係唔可以偷懶，尤其係負責全香港清潔事務嘅特區政府，食環署一偷懶就好鬼死大劑，輕則垃圾滿街，重則老鼠為患。你知啦，老鼠係污糟邋遢嘅帶菌者，最鍾意喺藏污納垢嘅地方走來走去，過街老鼠隨時帶來殺人如麻嘅瘟疫，必須除之而後快。
趁住年廿八洗邋遢嘅大好日子，有政黨巡查過全港各區嘅衞生情況，發現有八十八個衞生黑點。冇錯，八十八個衞生黑點係比去年嘅一百零七個少咗，之但係始終唔係一個小數目。若然你係無法忍受骯髒環境嘅潔癖者，你大概會話，衞生黑點一個都嫌多啦！
政黨巡查嘅結果顯示，常見嘅問題係阻街同違例擴展營業範圍，引致環境衞生、噪音以及阻塞公眾通道等等情況，對附近居民同行人造成滋擾。於是乎就建議嘞，加強對違例擴展營業範圍嘅食肆同商戶重點掃蕩檢控，例如喺秋冬季加強對部分提供時令食品嘅食肆巡查並且執法，研究加強罰則同加快處理檢控程序，藉此增加阻嚇性。
講到藏污納垢，不得不提領匯旗下嘅街市。喂，領匯淨係識得不斷加租，有冇諗過辦法改善街市嘅衞生呀？其實講真吖，好心食環署等等相關部門做好清潔工作啦，全城清潔運動唔可以三兩幾次就偃旗息鼓，必須持之以恒，定期持續進行。全城清潔運動就好比一個人沖涼，唔通今日沖咗，明日就唔沖咩？
講開又講，搞衞生少不免倒垃圾，目的係源頭減廢嘅垃圾徵費計劃幾時落實呢？垃圾徵費第二階段公眾諮詢已經結束嘞，可持續發展委員會將收到嘅意見交由獨立機構整合同分析，預計今年會有報告提交環境局研究咁話喎。之不過咁，民協以及工聯會嘅調查結果顯示，仍然有六成半同四成半受訪者反對實施垃圾徵費，七成受訪公屋居民更加認為政府建議嘅收費水平不合理。呢兩個政黨認為，喺欠缺完善回收配套措施嘅情況之下，對垃圾徵費可行性有保留，忠告政府未做好回收配套之前，垃圾不宜徵費。
計功夫茶話齋，政府總部都係一個衞生黑點，裏面充斥大量人形廢物，如果要有效落實垃圾徵費計劃，並且做好全城清潔運動，有必要將人形廢物掃地出門。總而言之講到尾，全城清潔洗邋遢，不必等到年廿八！