政情：ＣＹ低調行花市 防有人博出位
近年高官行花市示威衝擊不斷，粗口及雜物橫飛，認真大吉利是。政務司司長林鄭月娥同政制及內地事務局局長譚志源(Raymond)，早前分別落旺角花墟同維園行花市時，就各自遇上示威同畀人掟膠屎，搞到高官行花市變成高危活動咁。特首梁振英（CY）尋日去咗荃灣沙咀道嘅年宵市場買年花，不過就冇事先通知傳媒採訪，令佢可以無穿無爛，全身而退。CY就解釋，佢唔通知傳媒並非怕咗啲示威者，而係費事有啲人喺新聞界前刻意衝擊博出位喎。
多名問責團隊成員先後中招，仍無損CY落區行花市嘅雅致。佢尋日喺多名新聞處人員同警員陪同下，去咗荃灣沙咀道花市買年花，行咗短短半個鐘，就先後同大批一同行花市嘅市民、老人家、幼稚園學生同檔主握手影相，最後仲買咗日本海棠、富貴子、火鳥同一帆風順四款年花，一共使咗六百二十八元。
事前唔通知傳媒
CY事後發表網誌，話佢唔事先通知傳媒，係因為唔想有人喺新聞界前博出位而刻意衝擊，搞到影響到啲檔主同行花市嘅市民。對於Raymond前日喺花市畀人掟膠屎，CY強調香港社會絕對唔會容許衝擊法律底線嘅行為。