中環出更：快慢必唔似樣 何來點錯相？
人民力量核心成員近日接連遇到暴力事件，先有「快必」譚得志上周三做完網台節目後，畀三名印巴裔男子襲擊受傷，到尋日又輪到「慢必」立法會議員陳志全嘅地區辦事處遭人刑毀。雖然暫時未知兩宗案件是否有關，但有人力成員就質疑日前「快必」遇襲其實係「點錯相」，懷疑施襲者本來係想襲擊「慢必」。之不過「快必」同「慢必」兩人一肥一瘦，一個有戴眼鏡一個無，又有乜可能會認錯呢？
陳志全議辦遭刑毀
尋日朝早約七點，保安員巡經將軍澳健明村健暉樓地下時，發現慢必喺該處嘅議員辦事處外一塊玻璃窗，懷疑畀人用硬物破壞，玻璃碎片散布滿地，懷疑有人老爆，隨即報警處理。慢必職員點算後，證實辦事處並無財物損失，警方遂將案件列作刑事毀壞案處理，交由觀塘警區刑事調查隊跟進。
慢必自言辦事處同佢本人事前都無收過恐嚇電話，相信自己唔會因為得罪人而被報復，強調今次已經係本月內第二次針對人力嘅襲擊事件，事態嚴重。
卓妮