中環出更：僱傭之道在包容
香港最近先後揭發多宗港人僱主涉虐待外傭案，掀起全城關注，但亦不時聽到有僱主埋怨畀外傭玩殘，點樣維持良好賓主關係，真係大有學問。家中有多達五個外傭嘅愛沙尼亞駐港名譽領事林建康太太黃寧艷坦言，曾經遇上印傭偷偷狂打長途長話，帳單長達廿頁。廠商會會長施榮懷（Irons）就曾經碰上經常打扮性感兼喜愛夜蒲嘅菲傭，頭痛到極。不過佢哋都呼籲香港僱主對外傭多啲包容，體諒對方離鄉別井打工嘅苦處。
林太對外傭向來好長情，家傭平均打工六至八年，夠晒忠心。不過幾年前，林太曾遇上一個蠱惑印傭，趁佢同老公外遊新加坡幾天，即刻日日狂打長途電話返印尼。林太返港後收到厚厚帳單，當堂嚇咗一跳，細問之下，原來係一位新丁印傭作怪。最慘係對方被揭發後，仲死撐唔關佢事，激到林太紮紮跳，最後惟有將對方解僱。
林太承認請外傭多少講彩數，未必個個啱心水，佢個人就偏向聘請資深外傭，會較少撞板。佢又特別提醒其他僱主，指唔少外傭初到香港時人生路不熟，相當驚青，有啲人甚至連搭電梯都腳震，僱主宜多包容及體諒，避免衝突爭拗。
「唔好當對方係隻牛」
講起「問題外傭」，Irons自爆佢都請過一個，對方常作性感打扮，每次出門例必穿上迷你裙，行徑惹人懷疑，有次深夜十二點施太推開房門，發現菲傭仲未返屋企，屢勸不改後終要下辭退令。
前仁愛堂主席史立德就相當好彩，聘請外傭廿多年都無嘗過激氣事，佢自言秘訣係給予外傭多啲休息時間同假期：「千祈唔好當對方係一隻牛，一日廿四小時要外傭做嘢，係人都煩躁。適當時候應該畀對方抖抖，放幾日假輕鬆吓。」
卓妮