政情：公民講場︰高官行花市 待遇天與地

維園花市，黨派攤檔林立，特別容易「着火」。政制及內地事務局局長譚志源（Raymond）尋日去到維園行花市，就慘遭社民連同熱血公民狙擊，前者向Raymond後面掟寫住「你呃人」嘅枕頭，後者就向佢掟「黃色膠糞」，搞到Raymond要多名便衣幫手開路先走得甩，非常狼狽。反觀副局長劉江華尋日喺旺角花墟行花市，既無政黨狙擊，市民見到劉江華仲好開心，劉江華寫嘅揮春仲成搶手貨，眨下眼就派晒。派政改揮春都係想宣傳啫，今次Raymond被人掟嘢，收晒宣傳之效啦。