政情：今日你上鏡︰龍「紋身」淨心

陳淨心自從離開咗愛護香港力量，另起爐灶成立愛港行動，聲氣都少咗好多。不過佢周不時都會喺社交網站留言，保持人氣，好似近日咁，佢就上載咗一幅相，見到佢喺右邊頸部「紋」上一條龍，唔通佢要表明心志，要做龍的傳人？有網民一眼就睇得出，陳淨心嘅紋身係印水紙，部分就話「紋」得唔錯，又叫佢剪番個潮啲嘅髮型。佢就話早排喺大埔一間精品店見到，用五蚊買一張嚟玩玩，條龍貼咗唔夠兩日，就會消失。