政情：馮國經馬場買呔撐自己
一個英國著名男裝品牌尋日喺沙田馬場舉行盃賽，利豐集團榮譽主席馮國經（Victor）都不忘買番條自家品牌領呔以示支持，盛惠八百幾蚊，仲即場換上新呔。
Victor搞盃賽，富商好友都嚟撐場。現場設有品牌專櫃，Victor與太太到場後喺專櫃前仔細打量，好快睇中一條限量版綠色領呔。Victor拎上手後愈睇愈鍾意，索性喺鏡前將領呔打上，馮太都笑咪咪話滿意，叫老公戴住新呔出席盃賽。馮嘅千金馮詠儀都配合大會主題，由頭到腳一身翠綠打扮。佢頭上頂禮帽，凌晨兩點至由美國運抵香港，原來因為當地大風雪，航班一度延遲，幸好最後有驚無險。
彭穎生獲奧雲簽名波
女童軍總會香港總監彭徐美雲的公子彭穎生（Victor）都即場睇中一件黑色西裝，尺碼fit晒，十足度身訂造，埋單找數六千元。不過最大驚喜，唔係件衫，而係大會安排即場購物滿一定金額的客人，喺英國著名球星奧雲手上接過一個親筆簽名的足球。不過奧雲簽咗一個波就走，Victor係唯一的幸運兒，真係開心過中六合彩。