政情：鄉局組黨莫才靠嚇

三分一人冇鄉事背景

林偉強尋日出席一個電視節目時，幫手解說組黨嘅構思，佢話未來鄉議局個黨嘅成員唔應該局限於局方人士，因為佢哋依家局內有三分一人，包括顧問同執委都冇鄉事背景，又或者係非原居民，所以只要唔係同時戴住其他政黨頂帽，都可以代表參選喎。對代表參選者要求咁低，即係就算組黨成功，個黨都好鬆散啦，唔通發叔之所以話組黨，其實只不過用嚟嚇人、用嚟講數？

其實鄉議局過去已曾多次派員出選，好似林偉強咁，就分別喺九六年同九八年，參與過臨時立法會及立法會新界西直選，只係兩次都落敗，所以搞到發叔喺○四年要轉戰區議會界別，讓個鄉議局席位畀佢囉。當時因為加上民建聯嘅協助，先稍現鄉議局風光日子，一共四名有鄉事背景嘅議員，包括發叔、林偉強、現任行會成員張學明同大埔區議員李國英同時喺議會入面，但隨着該局同民建聯割裂，此情不再，鄉議局自此就繼續屈縮於功能界別。

林指建制派各有理念

至於依家喺其他政黨排緊第二、第三梯隊嘅局方成員，林偉強就呼籲大家要取捨，該局會招攬佢哋回巢，鄉議局亦有信心可於來屆立法會選舉穩取兩席。至於點解要組黨，林偉強就話因為依家啲建制派都有自己嘅理念，為咗鞏固票源會犧牲同僚，所以鄉議局一定要有更多代表喺議會，先可避免下情不能上達。

其實鄉議局嘅顧問的確有唔少人，不過弊在好似新民黨田北辰、自由黨田北俊及代表廠商會嘅林大輝等顧問，都唔係鄉事派成員。搵呢啲冇鄉事背景嘅人士嚟參選，又真係可確保佢哋以後會下情上達咩？預期個鄉事黨名存實亡，咁何必花咁多口水話組黨，所以睇嚟組黨之說都係用嚟講數居多。