政情：中環出更：張文光招兵 迎戰「進師盟」
香港教育專業人員協會（教協）內鬥愈演愈烈。繼教協理事韓連山早前公開宣戰，組織「進步教師同盟」參選教協監事會後，教協副會長張文光尋日亦宣布組織「薪火相傳」十人團隊，競逐監事會十九席位。對於「進師盟」早前公開抨擊教協近年成為民主黨B隊，以及立場模糊等指控，張文光反擊指對手作風激進，仲話擔心一旦對手當選會引發會員退會潮。
不認教協淪白鴿B隊
張文光自從退居副會長同無做教育界立法會議員後，較少喺幕前露面。佢尋日聯同一眾教協理事、前線老師宣布成立「薪火相傳」競逐教協監事會，當中包括擔任教協理事三十四年嘅陳漢森以及支聯會常委徐漢光。
早前「進師盟」宣布參選時力數教協不是，批評教協近年淪為民主黨B隊。張文光反駁指，教協從來同民主黨切割，反而韓連山走嘅路線偏激，仲不時游說會員參加佢所屬嘅保衞香港自由聯盟活動，擔心偏激人士當選，會引發會員退會潮，仲話如果因為教協管理層嘅轉變，而影響同支聯會日後合作關係，會好遺憾咁話。
卓妮