政情：中環出更：蔡加讚拉隊瑞士尋「寶」
一年一度嘅瑞士高檔鐘錶展SIHH，係鐘錶界名人採購嘅年度重要盛會，剛結婚未夠兩個月嘅喜運佳主席蔡加讚（Karson），親自拉隊去探索來年嘅時尚潮流。做鐘錶生意嘅香港工業總會主席劉展灝（Stanley）及前香港鐘錶業總會主席梁青華（華哥）都有去，佢哋仲趁機到號稱世界第一嘅法國一級名廚學校歎美食，仲戴起廚師帽學炒蘑菇，實行寓工作於娛樂。
華哥話，今次佢哋應某國際知名品牌邀請，先飛到法國停留三日，期間去博物館欣賞世界一級古董珠寶展覽，六百件價值連城嘅稀世珠寶，包括全世界最大的四百七十八克拉藍寶石，仲有印度皇室佩戴嘅珍貴首飾，實在令人大開眼界。近排內地加大反貪腐力度，令鐘錶業受到波及，咁一班行家入貨爽手定謹慎咗？華哥話， 正常入貨，預計今年市道應該唔會太差，事關明天會更好嘛。
去埋法國歎「第一美食」
法國美食聞名於世，佢哋一行二十多人拉隊去世界排第一嘅餐廳Ecole de Cuisine歎晚餐，老闆Alain Ducasse親自招呼。時尚名人虞茱迪亦在場，雖然佢唔係做鐘錶行業，但應品牌邀請去享受VlP之旅。眾人歎美味帶子及黑松露之餘，仲下廚學做世界一級大廚。華哥同Stanley都戴上廚師帽學炒蘑菇，大呼過癮。當晚最後每人仲有禮品收，就係一頂廚師帽喇。
原來Karson參加完鐘錶展返港後，即刻又飛去廣西開會，認真頻撲。Karson喺法國期間，同佢感情深厚嘅家姐蔡加怡（Crystal）間西貢度假屋遭爆竊，好彩坐緊月嘅Crystal冇咩事，虛驚一場，唔知Karson有冇越洋送上慰問呢？
卓妮