有朋自遠方來，不亦樂乎。香港作為旅遊之都，愈多旅客當然愈好喇，不過咁，由於旅遊配套設施不足，尤其係酒店房間長期短缺，唔止搞到無牌賓館遍地開花，連離島都被無牌度假屋攻陷，搞到烏煙瘴氣，就算有朋自遠方來，亦未必「樂乎」嘅咋。
好似長洲咁吖，有度假屋公司聲稱旗下四幢村屋九間客房全部領正牌，每晚收費最高超過千元，拍得住市區四、五星酒店。點知記者翻查民政事務總署嘅「持牌度假屋」名單，竟發現該公司實際上只有兩幢村屋四間客房領有牌照，其餘全屬無牌經營嘅「影子客房」，問你服未。
咁都未算吖，過去因為「燒炭」而聞名嘅東堤小築，更加懷疑係影子客房嘅重災區。上址十六幢村屋共登記二百一十個持牌客房，但業內人士估計，東堤小築內二十八幢村屋，七成經營度假屋，懷疑無領牌嘅客房最少二十間，大部分屬於持牌度假屋嘅影子客房。為咗掩人耳目，度假屋門外一般唔會顯示任何門牌，好多住客矇查查，幫襯咗無牌度假屋都唔知。
大家咪以為呢啲係小事吖，無牌度假屋消防設備欠奉，安全問題多多，好似計時炸彈咁，隨時一鑊熟嘅咋。例如東堤小築其中一間影子客房，陳設簡陋唔在講，連最基本嘅煙霧感應器都冇，甚至連房內嘅窗戶都被鎖死，如果唔好彩發生火警，後果真係不堪設想。
另一個旅遊熱點大澳亦唔好得去邊，最少有五間特色民宿喺網上招客，其實只有三間持牌。其中一間疑似無牌民宿負責人仲不斷向記者推銷旗下兩間棚屋，話可以容納二十人添。冇錯，棚屋係大澳嘅特色，弊在裏面完全冇消防設備，二十人一齊入住，都咪話唔牙煙。唔係功夫茶危言聳聽，火燒棚屋嘅新聞時有發生，萬一好嘅唔靈醜嘅靈，咁就大吉利是咯。
講到底，有需求就有市場，無牌度假屋愈開愈多，主要原因係酒店房間不足。去年訪港旅客超過五千四百萬人次，預計二○一七年達到七千萬，二○二三年更會突破一億添，但目前全港酒店只有七萬個房間，到二○一七年亦只係增加到八萬四千間，遠遠追唔上需求；加上法例寬鬆，當局執法不力，無牌賓館及度假屋本小利大風險低，有乜法子唔遍地開花吖。
所以話，水能載舟，亦能覆舟。旅客源源不絕，固然令香港財源廣進，同時亦帶來唔少問題，無牌度假屋只係冰山一角咋。咪話功夫茶唔提醒，如果港府再唔諗辦法改善旅遊設施，唔止中港矛盾愈演愈烈，而且隨時爆大鑊吖！