政情：公民講場：爵士日理萬「貪」縱容收禮顯明

「貪湯」前廉政專員湯顯明任內豪花公帑瘋狂外訪同送禮，而收禮亦係冇王管，佢尋日再被問及有關貪婪劣行時，竟然卸責話「貪曾」前特首曾蔭權爵士在任時「日理萬機」，為咗唔想「麻煩」貪曾，所以冇就每項外訪行程變動徵詢貪曾同意，而在收受禮物及酬酢方面，亦未曾試過向貪曾口頭匯報。咁講法，即係貪曾一直對貪湯縱容懶理。無他嘅，貪曾所謂嘅「日理萬機」，睇怕都係掛住貪盡海陸空、歎盡省港澳，大有大貪，仲得閒理會啲細嘅貪幾多咩，咪各有各貪，貪得幾多得幾多囉，呢對大小雙貪簡直係香港之恥。