政情：星星團年真惜食 兩人一餸
臨近歲晚，唔少人都同親朋戚友食團年飯，而環境局局長黃錦星都唔例外，但佢就貫徹惜食形象，聲稱外出食團年飯時，每席十二位只會叫六道菜，平均兩人分一道菜，真係夠食？佢仲話會鼓勵飲食業界效法，推出每席六道菜嘅套餐，等香港少啲大嘥鬼喎。
活動剩菜畀街坊打包
香港青年協會尋日在十八區筵開千席「鄰舍團年飯」，宴請街坊食盆菜，有份主禮嘅黃錦星都有份食，盆中有鮑片、腩肉等，非常豐富。有人質疑咁大盆盆菜，會唔會食剩變廚餘，黃錦星就堅稱唔會，話食唔晒嘅菜會畀街坊打包，會場嘅餐具亦可循環再用。
同場食盆菜嘅仲有財政司司長曾俊華、運輸及房屋局局長張炳良同教育局局長吳克儉，但佢哋就無黃錦星咁「惜食」，食咗兩啖就急急腳走人，臨走時曾俊華被記者追問，下月公布嘅財政預算案有無增加惠及中產措施，佢推說趕時間，無回答就離開喇。