政情：唔認得副局 慢必賴近視
中學嘅常識同通識科應該都要學政府架構同要認清官員嘅名字及樣貌，但尋日就發現其中四名立法會議員未必及得上中學生，因為佢哋認唔晒啲副局長。話說議員田北辰（田二少）、蔣麗芸（Ann）、黃碧雲（一舊雲）同陳志全（慢必）出席電台一個新年錄影節目，期間主持人攞出新任發展局副局長馬紹祥嘅照片畀大家猜猜係邊個，點知冇人識答，而慢必就話自己近視睇唔清喎。
蔣麗芸：呢個邊個嚟？
咁上任冇耐嘅財經事務及庫務局副局長劉怡翔呢？依然冇人識，阿Ann仲反問主持人，呢個邊個嚟？至於點解唔認得，佢哋話啲副局長冇搵過佢哋傾偈喎。其實副局長被指知名度低已經唔係第一次發生，但身為議員，呢啲就唔係藉口囉！
農曆新年將至，大家着到成個利是封咁出席節目啦，唯獨田二少着咗一身綠色唐裝衫，佢話因為知道布景一定以紅色為主，所以咁着係為免撞色，果然搞fashion嘅人係唔同啲喎！