政情：Hea擺年宵 政黨聽蝕
馬年將至，維園年宵開鑼，唔少政黨都按傳統租番個檔口，賣嘢籌款兼當作宣傳，但多個政黨未知係咪江郎才盡冇晒橋，抑或愈搞愈冇心思，今年除咗民主黨（白鴿黨）盡地一煲靠賣廁紙闖血路，支聯會賣「手指」籌裝修費外，好多政黨都相當hea，好似新民黨賣馬公仔填數，連向來創意無限嘅人民力量（人力）都只係翻炒「回水」議題，回唔回到本都好成問題。
白鴿黨今年冇嘢賣走去賣廁紙，有「乳鴿」將曾經紅極一時嘅「路福西」狼公仔等印上廁紙，聲稱比立法會議員王國興早前收集返嚟嘅公廁廁紙更潔白、更順滑。賣廁紙創意度滿分，但一套兩卷廁紙賣成三十八元，即使買四卷有特價亦貴絕全港超市，加上以該黨今年檔租五萬四千元計算，人人買四卷都要賣逾三千卷先至維到皮，仲未計燈油火蠟等成本，蝕本生意幾有創意都係假。
記憶棒藏六四點滴
支聯會就實際得多，「江湖救急」惟有賣「手指」，講緊嘅係佢哋今年首推「六四記憶棒（USB）」，驟眼睇佢只係一隻普通手指，但其實入面儲存咗好多有關「六四」事件嘅文字紀錄、相同紀錄片，為新建六四紀念館籌措五十萬元裝修費。
不過，過去無論立法會辯論抑或示威都創意無限嘅人力，支持者今年難免跌到一地眼鏡碎。陳偉業向我哋介紹人力得意之作「回水一萬元」風車，其實只係二次創作咗張假金牛扮一萬元，摺起當風車送畀支持者。人力檔口除咗該黨嘅風褸，T恤就佳作欠奉，唔似人力作風喎！
新民黨公仔欠創意
若然要數全場最hea政黨，肯定非新民黨莫屬，皆因佢哋只係從內地買咗六款共四百隻馬公仔應節。雖則話該黨財源不絕，但靠賣呢堆創意零分兼同新民黨一啲關係都冇嘅馬公仔，唔好講收回成本，連最基本嘅宣傳效用相信都達唔到囉！所以話呢，香港想做亞洲創意之都？睇怕仲有一段好長嘅距離。