中環出更：廠商會被「滅聲」 方文雄稱無意
卓妮前日講過，四大商會就施政報告搞咗個午餐會，邀請特首梁振英（CY）出席演講，並安排CY回答在場人士四條問題。不過，負責做主持嘅中華總商會（中總）副會長方文雄（David）只係點咗所屬嘅中總、工業總會、香港總商會及美國商會提問，反而中華廠商聯合會（廠商會）代表就冇得問。David尋日出席一個活動時澄清，事前並無內定提問人選，亦對座位編排全不知情。
已向吳永嘉致歉
David話，當日午餐會答問環節係畀台下人士即場舉手發問，佢只係隨意挑選，而四大商會獨漏廠商會冇得提問，純屬巧合，佢事後已即時向廠商會會長施榮懷解釋整件事，並向舉手提問嘅副會長吳永嘉致歉。佢話，中總同廠商會一直以來都係兄弟會，唔想因為小誤會而影響大家嘅關係，所以今日會正式以書面向中總同廠商會解釋整件事。
David笑笑口話，自己擔任主持仲有好大進步空間，而得到今次寶貴經驗後，如再遇上到同類情況發生，一定會要求主講嘉賓答多一兩條問題，咁就大家都高興喇。
卓妮