中環出更：晶晶教仔逗利是
霍家新抱郭晶晶產後冇耐，近日已頻頻出席公開活動，佢尋日就喺二千多名小畫家見證下，獲委任為聯合國兒童基金香港委員會大使，成為該會創會以來首位奧運金牌得主擔任大使。初為人母嘅晶晶話好榮幸獲委任，而經歷過懷孕生仔，更加令佢關注兒童嘅需要，特別係中國貧困地區兒童及兩地母嬰健康工作，晶晶希望天下間所有寶寶零受苦，能夠健康成長，發揮所長。
聯合國兒童基金會尋日在維園舉行小畫家大夢想繪畫比賽，除咗獲委任做大使嘅晶晶出席主禮外，仲有食物及衞生局局長高永文、財經事務及庫務局常秘區璟智，當然唔少得委員會主席陳晴（Judy）啦！Judy致辭時呼籲善長仁翁慷慨解囊，各嘉賓隨即欣賞現場小童繪畫，高永文感慨話，依家啲小朋友好幸福，佢細個時就冇咁機會同父母一齊玩過呢類親子活動喇。
與陳晴分享湊B心得
卓妮同Judy傾開，原來佢同晶晶分屬好友，當然有同晶晶分享湊Ｂ心得啦，晶晶話多得Judy，令佢佗Ｂ佗得輕鬆啲。晶晶話囝囝仲有幾日就五個月大：「他每日都不一樣，可轉身及坐一會兒，好驚喜。」至於啟剛有冇幫手湊Ｂ，晶晶就話啟剛工作忙，但放工後一定會洗手抱抱囝囝嘅。
農曆新年將至，會否教定囝囝做恭喜手勢去逗利是？晶晶笑言：「有教動作，但未學識，教他做動作時好好玩。」講番今次小畫家大夢想繪畫比賽活動，係為中國貧困地區嘅兒童送新年禮物，活動籌得嘅善款會支持基金會喺中國貧困及偏遠地區推行嘅母嬰健康工作。
卓妮