中環出更：商界午餐會 廠商會被「滅聲」
商界人士眼中，排名、次序向來係重中之重。尋日商界聯席午餐會，由各大商會聯合舉辦，請到特首梁振英（CY）出席，但問答環節時發生「蝦碌」，負責做主持嘅中華總商會副會長方文雄點咗四人發問，頭三人係傳統四大商會嘅香港總商會、中華總商會及工業總會，但第四人竟然唔係中華廠商聯合會中人，反而美國商會有得發問。今次呢條數，睇怕方文雄都唔知點還畀廠商會好。
舉極手都冇得發問
商界聯席午餐會陣容龐大，喺會展擺咗百幾圍，在場唔少外國商會都想借機會向CY發問，但見方文雄點咗中總同工總問頭兩條問題後，察覺有啲唔對路，事關坐喺後排嘅美國商會派人不停高舉枱號牌，似乎不滿點解外國商會冇得問。到方文雄點咗總商會發問第三條問題後，美國商會中人就將個枱號牌愈舉愈高，現場睇都幾礙眼。或者係方文雄見勢色唔對，所以將最後一個發問機會畀咗美國商會，搞到廠商會冇得問。
廠商會會長施榮懷事後難掩失望之情，佢話副會長吳永嘉不斷舉手，都冇人理佢，唔明點解冇得問。不過，施榮懷都算大方，話最緊要有其他商會代表發聲，相信廠商會下次一定有機會發問喎。
卓妮