中環出更：製探月車模型不遺「餘」力
上月「嫦娥三號」着陸器及「玉兔號」探月車成功登上月球，仲大玩自拍，全球矚目。最近呢兩款探月車模型成為內地航天迷收藏新寵，原來模型正係中華廠商聯合會副會長顏吳餘英（Katherine）旗下集團所製造。Katherine話，大約兩年前中國探月工程辦公室（探月辦）喺廣東一帶搵製造商，後來主動搵佢洽商，最後獨家授權佢哋製造探月車模型，確係受寵若驚。
Katherine話，今次佢哋製造嘅模型分兩種，一個係實物咁大，主要係提供畀博物館收藏，另一種係一比八模型版，供內地銷售，以宣揚中國航天科技成就。由於事前必須高度保密，所以佢哋特登搵一組人專責跟進，模型設計師先後上過北京四至五次，商討模型設計細節，由於模型係國家航天科技嘅象徵，所以要求甚高。好似月球車表面嘅金色部分，就要混入24Ｋ金先至做得似樣，而輪胎避震組件要求亦相當高。
獲中國獨家授權感光榮
Katherine坦言，今次製作探月車模型算係公司成立以來比較複雜同艱難嘅一次。雖然係咁，但佢感到好光榮。其實佢間公司已成立四十七年，每日大大細細嘅玩具車產量多達三、四十萬件，唔係講笑。
依家好多企業都交棒畀第二、三代接班，Katherine都唔例外，佢百仁基金副主席嘅兒子顏志永負責公司主要業務，大女顏明潤及細女顏明秀（Candy）亦返公司幫手。Candy笑笑口話，佢從小喺玩具車陪伴下長大，所以自細就好男仔頭，大個咗之後勁鍾意揸車。顏家事業順利承傳，難怪Katherine輕鬆話，佢就有多啲時間投身公職喇！
卓妮