打邊爐，食乜好？天寒地凍香港人最鍾意打邊爐，即使係熱辣辣嘅夏天都會勁開冷氣打餐飽，至於打邊爐嘅食材咯喎，最受歡迎嘅當然係海產啦，魚蝦蟹固然正，貝殼類一樣得。之不過咁，大家日後只要聽到一個「蚌」字，都係小心啲比較好。
冇耐之前喎，中國檢疫人員驗出美國進口嘅象拔蚌含有俗稱砒霜嘅砷，以及其他麻痹性毒素，於是全面禁止進口來自美國西岸嘅雙殼貝類海產，受影響嘅地區包括華盛頓州、俄勒岡州、阿拉斯加州以及北加州等等，禁令估計會持續至農曆新年之後。
講到呢度，功夫茶想同大家分享一下關於象拔蚌嘅少少資料。大家可能經常產生一個疑問，點解象拔蚌同其他貝殼類唔同，身體柔軟部分比起個殼大咁多嘅呢？原因其實係非常之咁得意，象拔蚌嘅生活習慣係長時間埋於海底沙泥之中，一埋就埋幾年甚至幾十年，靠伸出沙泥嘅吸管攝取食物。既然有沙泥掩飾兼保護，所以象拔蚌唔需要咁大個殼，久而久之就變成大家見到嘅怪模怪樣，有人形容為海底何B仔。
好嘞，既然中國官方全面禁止進口來自美國西岸嘅雙殼貝類海產，香港係咪有必要跟隨呢？本來係應該嘅，以策萬全吖嘛，好衰唔衰特區政府玩個性，唔肯學阿爺嗰一套，食物安全中心只係話會跟進，向美國有關當局了解受污染食品有冇進口香港，又會抽取美國象拔蚌樣本檢驗。問題係，跟進到呢一刻都冇任何行動，美國象拔蚌照樣喺香港通街賣。
為咗了解海產含砷嘅情況，本報記者抽取市面十個新鮮及急凍海產樣本，委託香港標準及檢定中心化驗，睇下砷含量有冇超標。一驗就大劑嘞，十個樣本全部有砒霜，含量由每公斤零點四毫克至十六點五毫克不等。其中兩個來自美國同加拿大嘅急凍桂花蚌，砷含量分別係每公斤十二點二毫克以及十六點五毫克，較《香港食物攙雜規例》嘅上限每公斤十毫克，分別多出兩成二及六成五。
喂喂喂，砷含量超標有乜嘢後果呀？醫學會人士指出，長期攝取高濃度嘅砷，有機會增加患癌風險，孕婦進食含砷海產，更加有可能誕下畸胎，你都咪話唔得人驚。
桂花蚌竟然係砒霜蚌，含砷量超標都照樣喺市面出售，你話食環署食安中心係咪失敗吖？把關不嚴嘅後果係害到小市民隨時病從口入。
好心食環署生性啦，一次係咁，兩次係咁，次次都係咁，對於問題食品硬係後知後覺。香港人只係鍾意打邊爐，唔係打砒霜呀！