大俠一去，大樹飄零，今時今日嘅日月報，有人話好似王小二過年，一年不如一年；依老朽觀察，過往頻頻出錯，每年刊登嘅「更正與澄清」與道歉聲明動輒一百幾十條，換言之，日月報「更正」當食生菜，「道歉」成為家常便飯，咁嘅一張日月報，虧佢夠膽自詡「公信第一」！
之不過踏入二○一四年，日月報終自拆招牌，話鑑於中大最新一次調查顯示，該報公信力排名下跌，所以要修改；網民反而心水清，指日月報煞有介事發聲明昭告天下，可能只係懼於商品說明條例，否則必定厚着面皮死撐「第一」！日月報自拆招牌後，負面新聞不絕：早前突撤換總編輯，管理層擬派馬來西亞裔嘅人員接任，員工話憂慮編採自主及香港新聞自由受到威脅；一些無聊政客又乘機抽水，嗌埋一份，又話憂慮若然失去中立報道和百花齊放嘅評論，市民便喪失了監察政府嘅公器云云。
阿哥，人哋出錢辦報，換個老闆可以信任嘅總編輯又關你哋乜事？人家未來履新，你哋又憂乜鬼啫？原先嗰位總編輯，講到明唔介意調職，係要食日月報之粟，「重利不足以變其心」，人各有志，你哋又肉緊啲乜啫？這不正是吹皺一池春水嗎？日月報今時今日內外交困，員工與管理層全不對嘴形，一張報章搞到烏煙瘴氣，正應了「叻唔切，遲早摺」嘅香港三字經！
講開又講，日月報自大俠一去，昔日嘅輿論鋒芒亦隨之消失，代替的是「更正與澄清」第一，家陣員工又與管理層不咬弦，連副刊作者都起干戈，李漢奸「開天窗」在先，其後又有四位副刊作者有樣學樣，日月報管理層又話「尊重編輯部與專欄作家的約定」，咁又有冇尊重買咗日月報嘅讀者感受，真金白銀睇天窗？睇怕未來日子，日月已經無光，「天窗第一」嘅報章，仲攞來獻世！不如摺咗佢好過喇！