中環出更：圓玄慈善夜 賓客好惜翠
臨近歲晚，城中慈善團體籌款活動浪接浪。日前輪到崇奉儒釋道三教嘅圓玄學院，喺荃灣如心酒店舉行慈善晚會暨同心關懷耆腦之夜。博愛醫院主席曾耀祥、仁愛堂主席陳鄭玉而（Connie）等善團都出錢贊助，互相支持打氣。Connie最唔話得，佢除咗捐支票、獻唱籌款之外，仲掏荷包投得一件珍貴嘅黃翡翠曲奇禮盒。農曆新年將至，栩栩如生嘅曲奇餅放喺屋企當應節全盒，夠晒吉祥。
當晚數百賓客現身，圓玄學院主席陳國超、副主席湯修齊（Henry）等人齊出動，陳國超大仔陳承邦及細仔陳承志亦幫手招呼賓客，佢哋兩兄弟都係圓玄學院委員。當晚籌款目標係為認知障礙症患者及其家屬提供服務，希望協助患者提升自理能力之餘，亦提供支援畀照顧患者嘅家人。咁有意義，一眾名人都瞓身幫手籌款，Henry亦載歌載舞，氣氛加倍歡樂。
陳李妮赴澳洲 過火熱新年
香港玉器商會會長羅志光都有到場，佢捐咗一件黃翡翠曲奇供慈善拍賣，五塊曲奇利用翡翠本身嘅色澤紋理雕刻而成，栩栩如生，出席賓客激烈地出價競投，最後由Connie以十萬八千元投得心頭好。Connie話，佢好鍾意立體雕塑擺設，所以一見就鍾意。
博愛醫院副主席陳李妮（Lily）亦獻唱籌款，嫁做馬來西亞新抱嘅Lily年年都去馬國過年，今年亦唔例外，年廿六就會同丈夫飛返馬國，除夕食完團年飯後即啟程去澳洲度歲。Lily話，澳洲正值夏天，聽聞氣溫高達四十度，係佢第一次過咁熱辣辣嘅新年喎！
卓妮