未入正題前，功夫茶想先同大家回顧一段大嶼山發展嘅崎嶇之路。
○四年，港府大鑼大鼓提出發展大嶼山大計，仲係威係勢成立咗一個大嶼山發展專責小組添，點知結果無聲無息，無影無蹤，不提起就當不存在。
○七年，港府舊事重提，公布大嶼山新規劃藍圖，又話興建物流園，又話興建水療度假中心，結果又係無疾而終。一句講晒，大嶼山「發展」十年，蹉跎十年，原因就係港府施政作風似足昂坪纜車，吊吊揈。
好嘞，現屆政府上場後又點呢？叫做好啲啦。嗱，嗰頭施政報告重提發展大嶼山計劃，呢頭就宣布成立大嶼山發展諮詢委員會，相隔只有兩日，一改以往歎慢板作風。委員會共有十九名委員，背景廣泛，包括立法會議員、區議員、旅遊界、物流業同學者等等，人就夠多嘞，不過成效有幾多，就要睇過至知。根據過往經驗，諮詢委員會經常淪為吹水委員會，研究復研究，諮詢復諮詢，話唔定最後又係煲無米粥嘅咋。
唔係功夫茶悲觀，而係形勢實在唔到你樂觀。一來，港府嘅施政效率大家都見識過喇，眼高手低，虎頭蛇尾，講就天下無敵，做就有心無力。發展大嶼山唔係靠把口，而係要有政策有配套有計劃，諮詢委員會係咪真係可以交到功課先？打個比喻吖，發展大嶼山等於開墾耕種，如果只係研究種乜，冇人落田播種，最後大家都係冇飯開嘅咋。
二來咯喎，就算港府今次真係有決心，但有冇能力推動呢？高官話喎，發展大嶼山唔會低估地區人士嘅反對聲音。其實，反對聲音又點只來自地區人士吖，佢哋固然係發展大嶼山嘅阻力，而政客嘅阻撓可能至係最大嘅攔路虎吖！
今時今日，香港愈來愈政治化，政客興風作浪，上綱上線，搞到烏煙瘴氣，七國咁亂。就講新界東北發展計劃吖，本來係解決房屋問題，幫助無殼蝸牛，點知政客話反就反，話阻就阻，港府一戙都無。發展大嶼山工程浩大，觸及環保及地區利益，你估政客會唔會咁易讓路吖？如果港府唔能夠排除萬難，披荊斬棘，講乜都冇用喇。
講起真係令人唏噓，發展大嶼山大大話話講咗十年，至今仍然停留喺吹水階段，董建華政府議而不決，決而不行，煲呔曾政府貪腐無能，毫無建樹，現屆政府終於肯做嘢，坐言起行，點知又身陷政治泥沼，難以自拔。嗱，時間唔等人，香港繼續內耗空轉，遲早倒退回小漁村時代，到時齊齊玩完，就唔使再為發展大嶼山頭痕啦！