政情：巨貪案「候判」之身 大劉揞肚蒲頭

牽涉華人置業主席劉鑾雄（大劉）、南華足球隊足主兼商人羅傑承等人嘅澳門巨貪案，所有被告嘅代表律師前日已完成結案陳詞，等候三月十四日再次開庭宣判。過去有好多例子，每逢被告喺等候法庭裁決前都坐唔安、食唔落，好似等候行刑咁，但一直以病為由而冇出庭應訊嘅大劉就啱啱相反，前兩日案件進行結案陳詞時，罕有地冇喺佢去開嘅灣仔富豪飯堂食晏，到尋日變成「候判」之身，佢又健步如飛咁現身富豪飯堂，食番餐飽飯。