政情：廠商會寶座 爭到底
香港傳統四大商會之一嘅香港中華廠商聯合會（廠商會），今年年底又到換屆之時，即係話將會再次風起雲湧。廠商會同其他傳統商會有少少分別，通常唔會出現等額選舉，換言之即係一定有內鬥喇。據我哋獲得嘅最新消息，兩大熱門會長人選，分別係做玩具起家嘅副會長顏吳餘英同第二副會長李秀恒，究竟邊個最終會跑出都係後話，大前題係要確定第一副會長陳淑玲真係唔想接棒至得。
按廠商會嘅傳統，無論資歷、業界地位或廠商會內部支持度，陳淑玲應該係下屆廠商會會長首選，所以當大家聽到顏太同李秀恒呢兩個名時，可能心中有疑問，難道陳淑玲並非合適嘅會長人選？我哋收到可靠消息，話陳淑玲願意繼續為廠商會效力，但就無意出選會長一職，呢個決定連佢堂兄、全國政協常委陳永棋（棋哥）都支持喎。由於陳永棋喺廠商會叔父輩級數，佢呢句說話一出，大家都認定陳淑玲唔會選。
顏太人緣佳 李秀恒勤力
廠商會會長寶座，由廠商會內一百名會董推舉出來，消息指綜觀過去多次選舉，未到最後一刻都唔知鹿死誰手，但多位會董都睇好顏太或李秀恒擔任，兩人各有擅長之處，前者以人緣佳見稱，後者就以勤力取勝，估計若陳淑玲唔出手，就離唔開呢兩人做會長。不過，大熱都可以倒灶，亦有傳聞曾經喺一個私人派對上，有人飲大兩杯，就指住另一位副會長吳永嘉猛叫「會長飲杯」，所以吳永嘉亦有可能爆出個大冷門。
施榮懷有機爭立會代表
會長一職出現激烈競爭，但廠商會立法會代表就好似冇乜人爭住做，廠商會一眾領導層都認為，現任立法會廠商會代表林大輝表現唔錯，呢幾年交足功課。如果佢願意留在功能界別，大輝絕對可以繼續連任，但如果大輝堅持走直選路線，廠商會先會搵第二個頂上。至於邊個可以代替大輝呢？有人認為現任會長施榮懷或有機會，況且佢口風都好鬆動，加上年紀唔大，無理由卸任會長後就唔做公職啫。