政情：中環出更：鄉紳撐政改 條件「有商有量」
成日將「有商有量」掛口邊嘅政務司司長林鄭月娥，尋日就政改諮詢深入鄉議局大樓，想話同班鄉紳坐低慢慢傾，但鄉議局主席劉皇發（發叔）同林鄭素有積怨，就算喺政改呢啲大是大非議題上同政府站同一陣線，但學發叔話齋「要人付出，都要畀啲好處人哋啦！」所以要求林鄭對新界政策都要「有商有量」咁話。不過，觀乎發叔同鄉紳嘅言論，似乎想同政府「又傾又砌」多啲喎！
要求保留功能組別
鄉議局同林鄭過去多次交手，好似新界村屋僭建、擴建堆填區方案同將西灣村納入郊野公園範圍嘅爭議咁，而發叔尋日同班鄉紳見完林鄭後，除咗要求下屆立法會選舉保留功能組別，亦要求下屆特首選舉嘅提名委員會若要擴大人數，鄉議局代表數目亦要按比例增加。
此外，鄉議局執委梁和平尋日亦趁出席公開場合向政府下戰書，批評政府將原居民土地納入郊野公園範圍做法粗暴，正部署同政府「拗手瓜」，仲揚言要政府喺新界東北同大嶼山發展上「寸步難行」添。所以話呢，「有商有量」真係好緊要。
林鄭傍晚又去咗立法會同十多名民主黨高層會面，係佢首次就政改拜訪泛民黨派。林鄭喺會前賣晒口乖，話該黨係泛民主派嘅中流砥柱，但會後佢承認雙方有嚴重分歧，黨主席劉慧卿更話如果政府夾硬嚟，該黨唔使佔中三子吹雞都會即時佔中。林鄭一日之內兩次碰到一臉灰，認真失禮。
卓妮