政情：中環出更：五邑青總出爐名人捧場
香港五邑青年總會日前舉行成立儀式暨首屆會董會就職典禮，好多名人鄉里齊去趁熱鬧，包括會長黃達東、利希慎後人利承武、香港資源主席黃英豪（Kennedy）及囝囝黃宇德等人。五邑係指廣東江門市轄下新會、台山、開平、恩平及鶴山，當地一向係中國最大僑鄉，本港就有超過一百二十五萬人，難怪當日咁墟冚。
Kennedy都係五邑人，當日特登同囝囝去撐場。最近Kennedy將香港資源一半股權賣畀六福集團，套現三億元，雖然令佢「新金王」名號不再，但公司引入咗財力雄厚嘅大股東，未來發展肯定更加一帆風順。Kennedy一身鬆晒，打算趁農曆新年同家人去新西蘭玩，初三就會返港，事關佢已約咗朋友年初三去車公廟行個大運喎。
陳李妮「代夫出征」
講起近期跌至四年低位嘅金市，Kennedy話，金價跌咗帶動旗下門市平均銷售額升咗幾成，近日已經開始有新年氣氛。佢預計今年黃金價格會企穩，徘徊喺每安士約一千二百美元價位，仲話依家好抵買添！
青年事務委員會主席陳振彬都係五邑人，所以就算身體不適都要去打氣。香港菁英會榮譽主席白富鴻、副主席甄韋喬（Mickey）都有到場，Mickey同時係總會常務副會長。卓妮轉頭見到博愛醫院副主席陳李妮（Lily）同佢弟弟李毅，事關Lily都係該會常務副會長。咦？Lily明明係海南人，點解又變五邑人？佢笑笑口解畫話，佢丈夫陳生係五邑人，但老公作風低調，所以由佢代夫出征喎！
首任會長黃達東見到咁多人去支持，開心到不得了。佢話總會籌備咗個幾月就已經有幾百名會員，成績非常理想，未來期望會員人數可以達到三千人，以便匯聚五邑新世代力量，為社會做事。
卓妮