「衙齋臥聽蕭蕭竹，疑是民間疾苦聲。」清代畫家鄭板橋呢兩句詩由風吹竹搖諗到民間疾苦，想像力確係豐富，意思其實好簡單啫，身為父母官應該關注民生，先至可以得到百姓支持。呢，一年一度嘅施政報告過幾日就出爐，今次究竟可唔可以得到市民支持，就要睇吓有冇關注民生喇。
同以前一樣，施政報告發表之前，例牌有唔少團體提出各種訴求，有人要求解決房屋問題，有人希望加強扶貧措施，有人敦促設立全民退休保障制度，有人關注青少年問題，有人呼籲改善幼稚園學券制，有人就認為應該興建更多醫院，可以講係百家爭鳴，百花齊放。一句講晒，雖然訴求多樣化，但全部同民生有關，政府聽到未吖！
正所謂，悠悠萬事，民生為大。有團體做咗一項調查，了解市民對施政報告嘅期望，結果受訪者最關注嘅範疇依次係民生及福利、房屋、經濟及就業，而政制及基本法就三甲不入。事實證明，即使政客成日搞風搞雨，多數市民對政治始終冇乜興趣。
咁都好正常嘅，香港一向係商業城市，如果經濟同民生搞唔好，講乜都係假。話時話，香港回歸後之所以不斷沉淪，經濟低迷，民生凋敝，就係因為社會愈來愈政治化。政客無風起浪，成日嘈喧巴閉，搞到香港淪為遊行之都，加上港府無能，施政維艱，試問又點可能有運行呢？尤其係隨着特首普選逐漸逼近，佔領中環一觸即發，社會更加紛紛擾擾，簡直令人不勝其煩。
有政客大大聲聲話，無民主就無民生喎。其實根本九唔搭八，港英年代從來冇民主，但民生就好過今日多多，咁又點解釋吖？計功夫茶話齋，如果經濟及民生唔掂，港人連開飯都成問題，就算一人一票選特首，都係嘥氣嘅咋。試諗吓，選票可唔可以當飯食吖？泰國夠有民主咯，點解又七國咁亂吖？
所以話，講多無謂，食多會滯，搞好民生最實際。香港話就話係富裕城市，弊在分配不均，貧富懸殊，窮人愈來愈多，加上房屋、安老、醫療、教育等問題一大堆，正如有人話齋，深層次矛盾已經到達臨界點，港府再唔諗辦法解決，隨時爆煲都似。老實講吖，港府窮到只剩下錢，唔係冇能力解決民生問題，關鍵係肯唔肯承擔啫。前朝政府縮骨卸膊，一事無成，現屆政府既然要穩中求變，就唔能夠漠視民意喇。好簡單，絕大多數市民要求改善民生，呢啲就係民意，如果施政報告又係冇料到，盞唔衰攞嚟衰嘅咋！