中央多番強調香港特首普選要緊跟《基本法》同人大常委會決定辦事，但部分泛民就堅持被指違憲嘅「公民提名」方案，好似大纜都扯唔埋咁。政制及內地事務局局長譚志源尋日就喺立法會政制事務委員會公聽會上，以煮飯嚟形容政改，強調「百人口味好難調」，好難煮到一味菜係符合所有人嘅口味，最緊要係「有飯開」，就算唔係完全啱口味都可以「食住先」，點都好過大家都冇得食捱肚餓喎！希望呢煲大鑊飯，最後唔會難食到入唔到口，甚至搞到人上吐下瀉啦！
