政情：陳恒鑌買唔起「養生水」
立法會議員陳恒鑌（Ben）外表黑黑實實，但原來年紀唔算大嘅佢，身體早已「五勞七傷」，膽固醇嚴重超標。阿Ben尋日出席一個新界社團聯會活動時透露，向來着重健康生活嘅現任政制及內地事務局副局長劉江華，曾經指點過佢養生之道，當中包括教佢飲一隻偏鹼性嘅礦泉水，但原來嗰隻礦泉水要成幾十蚊支，一向節儉嘅阿Ben實在買唔落手，最後無長期飲用。
阿Ben又透露，劉江華又教過效法中國太極功夫嘅精神，行步路、講句話，都刻意要放慢啲，話咁做不但可以養生，腦筋都可以轉得快啲喎。
聽聞今年各區區議會都有派代表參加嚟緊喺香港舉辦嘅馬拉松比賽。問及屬新社聯嘅阿Ben會否報名，佢自言以前都有跑過十公里比賽，但居然輸咗畀太太，依家佢腰骨唔好，即使有心參賽，估計都無力完成。睇嚟阿Ben真係要好好調養下身子，否則以後點樣喺立法會捱呀！