政情：激進反對派蹂躪《基本法》
中央及特區政府官員多番強調港人要尊重《基本法》，香港政制發展唔可以偏離《基本法》精神。不過尋日喺立法會政制事務委員會公聽會，多名激進反對派人士就肆意蹂躪《基本法》，除咗即場撕爛《基本法》文本外，仲有人話要用《基本法》嚟「抿屎」添，好彩最後冇實行到啫！
去公聽會 做騷博出位
同過往多場立法會公聽會一樣，唔少出席會議嘅騎呢團體同人士，都係想自我表現博出位，多過向官員及議員表達意見多啲。其中自稱「協助飯團入閘大聯盟」代表、外號「鹵味男」嘅錢偉洛，喺會上批評《基本法》制訂過程唔民主，並揚言自己平時會用本《基本法》嚟「抿屎」，並隨即企起身好似想當眾除褲咁，好彩畀委員會主席譚耀宗及時制止。
「熱血公民」代表黃洋達批評中央及港府官員就政改問題「僭建」《基本法》，然後隨手就拎起本《基本法》撕毀。不過佢可能唔記得咗，呢本《基本法》其實係立法會嘅財物，最後需要賠償畀立法會。好心佢下次做騷時，有品啲自備道具喇！