政情：林鄭落區被批「騷」味濃
「政改三人組」主席政務司司長林鄭月娥，尋日首次就政改諮詢落區派傳單，地點揀咗沙田第一城呢個傳統中產區。同政制及內地事務局局長譚志源上周落香港仔時，需要周圍「搵客」派嘢唔同，林鄭全程一碌木咁企咗喺度，再由居民代表安排街坊，排住隊、攞住咪，喺記者鏡頭面前向佢表達意見，「騷」味極濃。難怪期間有市民批評佢落區純屬係「promotion」（宣傳），如果冇心搞普選就唔好嘥時間、嘥錢搞咁多個人騷喇！
林鄭尋日首站先同第一城業主委員會成員飲個早茶，下午先至去屋苑內嘅商場門外見街坊。有居民要求放寬普選特首候選人門檻，「求其畀個ABC餐我食唔落」，有人質疑普選引入「公民提名」嘅可行性，亦有街坊就申請公屋遲遲上唔到樓、高通脹、以至教育同醫療等非政改問題向林鄭反映意見，批評政府做得唔好。
沙田嗌咪 劉江華湊住
林鄭落區嗌咪足足半個鐘，見咗二十幾個街坊都唔見有示威常客出現，無他嘅，咁多個中產區唔揀，係要揀第一城，皆因該區係公民力量同民建聯等建制派政團嘅重鎮，加上有身兼公記同民記成員嘅政制及內地事務局副局長劉江華「湊住」，啲激進泛民邊有咁易埋到身！