政情：兩民聯婚 為降服大輝
隨着十九位公民力量（公記）區議員以個人身份加入新民黨，新民黨同公記呢頭政壇婚事開始轉入大直路，雖然兩黨內部都有不同意見，但都「米已成炊」，唔嫁唔得。有指呢兩個建制派政團，係喺極有勢力嘅操盤人出任「媒人」下「逼婚」，有說係為咗幫新民黨主席葉劉淑儀或常務副主席田北辰（二少），挑戰二○一六年立法會超級議席，甚至有說係為葉劉參加二○一七年特首選舉鋪路。但根據可靠消息，呢頭婚事嘅主要目的，其實係旨在「降服」工業界立法會議員林大輝，並趁機將愈嚟愈唔似建制派嘅自由黨黨魁田北俊（田少）趕盡殺絕。
林仍「有救」 直選或得祝福
銳意喺下屆立法會選舉由功能界別轉戰地區直選嘅大輝，去年加盟公記並大力科水，目的正係取得公記喺新東嘅強勁椿腳支持，於一六年取代龐愛蘭「排頭位」出選。可惜走開地區路線嘅公記，選區議會就成績輝煌，選立法會始終唔夠其他政治立場鮮明嘅政黨打。加上大輝身為「唐營悍將」，多次公開批評CY特首梁振英，想得到操盤人嘅支持踏上直選之路，依然係關卡重重。
不過，大輝嘅廠商會背景，始終對佢有一定牽制，令佢喺多項大是大非投票中，最後都有「浪子回頭」歸邊撐政府。最近佢更瞓晒身支持政改諮詢，直斥泛民提倡嘅「公民提名」方案違反《基本法》。據聞操盤人覺得大輝仍然「有救」，今次新民黨變相吞併公記，負面嚟講就搶走咗大輝喺新東啲椿腳，但從另一個角度睇，只要大輝肯戴上「金剛箍」加盟新民黨，改行葉劉同二少嘅「又傾又砌，但最後都係撐政府」路線，就可以得到操盤人祝福，並兼得新民黨嘅中產票源同公記嘅地區椿腳，當選機會大增。
田少頻作反 連任機會大減
另一邊廂，上屆喺操盤人力壓下仍成功勝出新東直選嘅田少，過去一年半同CY政府嘅牙齒印愈咬愈深，繼司局級官員集體杯葛自由黨黨慶，田少日前又喺立法會搞小動作，串連泛民反對漁業持續發展基金撥款，疑似向CY公報私仇。據悉田少嘅言行已令操盤人徹底失望，決定向佢下驅逐令。新民黨形象中產，如該黨派人出戰新東，不論呢個人係咪大輝，都肯定會分薄自由黨唔少票源，令上屆已經唔算高票嘅田少連任機會大減。