中環出更：孭飛建安老院 博愛搏盡籌款
尋日沙田馬場舉行博愛盃賽事，城中名流及博愛醫院董事局一眾成員齊齊入場鬆吓，當中包括博愛主席曾耀祥、副主席陳李妮及李鋈發等人，前總理兼縱橫遊業務顧問袁振寧及太太林藹欣，更加帶埋兩名可愛囝囝入場玩。卓妮見曾耀祥同博愛永遠顧問黃帆風雞啄唔斷，原來佢哋斟緊籌款大計。
曾耀祥話，為咗不負恒基地產主席「四叔」李兆基捐地畀博愛醫院嘅好意，佢哋正全力推動早日開展喺屯門藍地，興建全港最大安老院嘅工程。嚟緊星期三特首梁振英公布《施政報告》，據悉將會宣布未來三至五年增加五千個新嘅長者宿位。曾耀祥話，未來幾年博愛會新增二千五百個長者宿位，雖然佔咗政府預計嘅一半，不過佔全港二萬五千個輪候長者數目只有一成，所以仍需各界一齊努力。
人多勢眾 齊心就事成
黃帆風就話，除咗向獎券基金申請撥款承擔安老院嘅建築費用，估計博愛仍需自行籌措龐大資金，呼籲社會各界慷慨解囊，共襄善舉。即將接棒做主席嘅現任副主席何榮添就話，博愛大家庭人多勢眾，只要齊心一定可以做好件事。
珠寶設計師劉黃寧達（Leta）同丈夫劉守良尋日亦有入場，仲有佢妹妹林黃寧艷及妹夫愛沙尼亞共和國駐港名譽領事林建康。Leta啱啱同家人坐郵輪暢遊加勒比海，享受咗十六日熱帶風情假期，難怪咁精神飽滿。Leta好開心話不枉此行，因為佢遊瑪雅時買到一件好靚、好特別嘅翡翠，加勒比海風情亦激發到佢新嘅設計靈感。早前佢已經推出咗兩個翡翠鑽飾系列，下一個將以彩色寶石為主題，為追求時尚嘅城中姊妹扮靚。
卓妮