政情：嫻姐辦長者宴 冇預勞福局
立法會超級議員陳婉嫻尋日同傳媒茶敍時，提到佢去年為獨居長者搞嘅團年晚宴，話呢班長者好需要大家關懷，所以佢今年會繼續搞，並分別於本月二十、廿一同廿三日舉行。咁邊個做嘉賓呢？嫻姐就話，今次冇邀請勞工及福利局官員，但就請咗特首梁振英（CY）、立法會主席曾鈺成等嘉賓。
獲善長贊助
除咗CY之外，曾鈺成都好似被傳過會選下屆特首，莫非嫻姐眼光真係咁獨到，想喺政改諮詢未完就搞個特首參選人比併會？嫻姐解釋，只係較多長者希望見到佢哋啫，特別係曾鈺成，啲長者唔知喺咩渠道可以見過佢，所以特別叮囑嫻姐邀請佢出席喎。
嫻姐又話，今次個活動獲一位善長贊助五十萬元，同埋敍福樓集團執董黃傑龍以優惠價提供膳食先至搞得成，雖然話係優惠價咋，但有魚食又有雞食喎。