坐關愛座撞老婦 女客惡人先告狀
【本報訊】拖篋惡女喪鬧長者，短片熱爆互聯網！網上近日瘋傳一段短片，內容描述一名中年女子，拖着行李篋佔用巴士關愛座，期間與鄰座老婦疑因碰撞口角，有人鬧爆老婦稱：「你估你係長者大晒呀？我遲啲都係長者啦……」。有女乘客不值女子所為出言勸阻，卻反被喝罵：「關你叉事呀，死八婆！」片段曝光後惹來網民熱議，號召「人肉起底」，一面倒直斥惡女不是，「個天會比機會佢做長者咩？呢啲人應該拎去火化……」
「長者就大晒呀」
據拍片女乘客在網上聲稱，一名坐在關愛座、拖着行李篋的中年女子（卅餘歲），起身移開行李篋讓一名阿婆（六十餘歲）入座，當她坐回座位時，突然將個篋「質」落阿婆的腳部，雙方為此展開口角，期間拖篋女更向阿婆連珠發炮。
適時，車上一名男乘客介入勸喻，不過惡女毫不理會：「你叫佢收聲，我咪唔嘈囉，長者就大晒呀，我遲啲都係長者啦……」又對着阿婆大罵：「你都黐線，你係咪仲要拗啫，你收聲啦！」老婦不甘捱罵反駁：「你點解唔收聲？」惟惡女卻愈鬧愈過癮：「我宜家咪畀你坐囉，你仲想點呀？」
此時，拍片女乘客質疑惡女不應坐在關愛座，惡女即反指有人多事：「我有個篋呀，關你叉事咩，你報警啦，你行開啦！」女乘客忍無可忍，斥責惡女：「畀老人家坐，死八婆！」惡女也報以「死八婆」回應。拍片女乘客事後在網上留言：「如果唔係要落車，我實同佢鬧過，真係未見過Ｄ咁既人！」
短片曝光後，多個討論區及facebook群組即有網民洗版，有人更起底指惡女姓鄭，一面倒留言直斥惡女「無品」。