潮流興食字，有人覺得創意澎湃，有人覺得俗不可耐。好似灣仔利東街咁吖，街坊本來稱之為「囍帖街」，點不知清拆重建之後竟然玩食字改名為「囍歡里」，馬上惹來網民群起惡搞，有人填歌詞「囍歡里讓我下沉，囍歡里讓我哭」，亦有人建議開設滷味專賣店，大寶號就叫「囍歡里滷味」。
食字呢家嘢，連官方及公營機構都樂此不疲，最新例子係扶貧委員會轄下嘅社會參與專責小組，下月起推出所謂「築福香港」活動。築福築福，築起幸福，祝你幸福，食字食得高明定係庸俗？見仁見智啦，情況就好比政府推出人口政策諮詢文件，名為「集思港益」，有人擔心下一代人口受到誤導，教壞細路嘅後果係以後唔知「集思廣益」先至係正字。
唔理佢食字唔食字，築福香港究竟係乜乜東東呢？扶貧委員會話要推動官商共同參與扶貧喎，所以安排一連串活動，包括農曆大年初一同初四招待八千名低收入家庭市民，去大球場欣賞賀歲盃足球賽。仲有吖，下月係「敬老月」，安排十八區食肆招待長者。委員會表示，整個項目經費五百萬元，其中三百萬由賽馬會贊助，另外兩百萬元公帑會向立法會申請。
民政事務局局長曾德成就話嘞，築福香港集中宣揚守望相助嘅精神，並非「家是香港」活動嘅延續。小組主席黃友嘉又話，將會推出「明日之星」計劃，估計有七千名基層青少年受惠，為佢哋提供職前訓練同實習機會，畀青少年同各行各業交流，預計今年年初陸續推出，仲會設立獎學金添。
講來講去，築福咪即係扶貧囉，常餐咪即係特餐囉，特餐咪即係快餐囉。大概因為有人覺得扶貧唔好聽，以免受惠者被標籤為窮人，所以用好聽少少嘅築福代替扶貧。如果係咁，不如扶貧委員會都改名做「築福委員會」啦。
即係咁，功夫茶唔太介意築福香港玩食字，只係有一個疑問，新年流流去睇一場賀歲波，或者十八區食肆招待長者，是否能夠有效扶貧呢？係，窮等人家係冇錢睇波，有波睇當然好過冇，問題係睇完波仍然冇飯食點算好呢？至於十八區食肆招待長者，食完一餐若然無以為繼，所謂築福僅僅係小恩小惠咋喎。
計功夫茶話齋，小恩小惠聊勝於無，不過最重要嘅始終係幫助草根階層脫離一貧如洗嘅無邊苦海。你知啦，與其送人一條魚，不如教人去釣魚，學識釣魚先至餐餐有餘吖嘛。所以咯喎，扶貧委員會唔應該停留於請人睇波咁低嘅層次，即將發表嘅施政報告同財政預算案更加有必要大手筆着墨於扶貧工作，唔好再做孤寒成性嘅守財奴喇！