政情：盧偉國謝偉銓求學有「良」師
資訊科技業界尋日開記者會呼籲政府成立科技局，除咗有IT背景嘅工程界立法會議員盧偉國（WK）出席外，仲有近年推廣IT學校應用嘅鳳溪公立學校行政總裁馬紹良。原來馬紹良中大畢業之後執教鞭，其中兩名高足，一個正正係WK，而另一個就係建築、測量及規劃界謝偉銓，兩個都做咗立法會議員。
畀馬紹良教過數理
馬紹良喺六九年崇基書院數學系畢業之後，就去咗當時嘅賽馬會官立工業中學（現稱「賽馬會官立中學」）任教數學及物理，WK係第一屆學生，難怪對佢記憶咁深啦！馬紹良形容，WK識好多種中樂，又識唱歌同寫文，似乎琴棋書畫樣樣掂，但佢只係教咗WK一年。
佢又話，當年謝偉銓比較乖，所以做過總領袖生長及圖書館總管理員，總之兩個學生成績都好好，算係由頭帶到尾。今次係WK親自邀請馬紹良出席記招，證明佢哋多年來都維持良好關係，如果謝偉銓在場的話，相信會有更多話題都未定。