政情：英文不通港鐵衰過小學雞
港鐵近期除咗頻頻壞車外，估唔到連簡單嘅英文宣傳字句都驚現文法錯誤，真係「小學雞」都不如。話說港鐵太古站大堂入閘機附近擺咗部顯示屏，主要播放一啲乘客資訊，我哋嘅讀者好眼利，發現顯示嘅走馬燈式警告字句「嚴禁攜帶金屬氣球進入車站或車廂」，英文版本竟譯成「Metallic balloons is not allow in station or trains」，總共有三個地方出錯，認真貽笑大方。
其實有關警告字句應寫成「Metallic balloons are not allowed in stations or trains」。上述字句運用咗被動句語法，但眾數嘅「Metallic balloons」係應該配搭「are」使用先啱，而「allow」又漏用「ed」，而「station」仲無埋「s」，唔通淨係太古站先至唔准帶金屬氣球進入？難怪讀者批評：「連小學生都唔會錯呢啲啦，真係教壞細路！」仲可能令到遊客以為香港嘅英文水平咁差添。
港鐵表示，有關錯誤字句已即時作出更正，並多謝乘客糾正錯誤。