政情：西貢孖寶政改鬥出位
方國珊（哪吒）同范國威（Gary）呢兩位西貢區議員，早前喺反對擴建將軍澳堆填區鬥到七彩，最近雙方鬥法仲伸延至政改諮詢戰場。哪吒尋日出席西貢區議會會議時「遲大到」，更一度發表長篇大論結果被多次熄咪；至於Gary前日以立法會議員身份出席港府政改晚宴時，到場僅約半小時就玩離席抗議，呢對「西貢孖寶」為出位真係抽水抽到離晒譜。
吳仕福怒插方做騷
政制及內地事務局局長譚志源尋日早上九時半到西貢區議會，展開首站區議會政改諮詢，外界以為Gary同哪吒呢對「西貢孖寶」定必坐定定爭曝光，點知前者喺會議剛開始先入場，後者更姍姍來遲，竟然早上十點四十五分先現身，足足比開始時間遲咗一個多小時。
不過，哪吒一到場就迅速投入角色，趁現場廿八名區議員已經發言，隨即半自嘲話平時未獲如此重視，可以一埋位就發言。其他議員聽到自然不是味兒，其中區議會主席吳仕福趁機冷嘲熱諷哪吒，仲因為哪吒長篇大論發言而四次熄佢咪，其後更進一步開火批評此等遲到早退行徑，其實就係做騷，搞到哪吒又出聲再反駁，令會議一度疊聲連連，火藥味甚濃。
會議後，哪吒為「遲大到」解畫，聲稱原因係前區議員、藝人劉丹嘅兒子結婚，佢要協助證婚工作。不過，哪吒並非律師，究竟點樣協助呢？
范頻頻抽水離晒譜
相比哪吒出位行徑，Gary都非省油嘅燈。佢前日出席政改晚宴時，逗留約半小時後就玩離席抗議「抽水」，有人仲目睹佢離場時先電召的士到場，先至肯上演離場抗議劇本。尋日早上更作第二度「抽水」，接受電台訪問時再次講述離席嘅前因後果。難怪事後有人老實不客氣話，佢唔似得「長毛」梁國雄等事前張揚打正旗號缺席晚宴，所以「抽水」行徑，「騷」味極濃。呢對「西貢孖寶」為出位認真「零底線」，相信會有更多精彩場面陸續上演。