中環出更：疑似飲大咗 騸雞阿基仲揸車
前晚喺政務司司長官邸舉行政改諮詢飯局，十七位立法會議員出席，成餐飯食咗兩個幾鐘，仲有紅酒供應。泛民主派議員單仲偕（騸雞）同馮檢基（阿基）食完飯出嚟見傳媒時，有人就覺得佢哋講嘢反應遲鈍、語無倫次，好似飲醉咗咁，之後佢哋兩個仲各自揸車離開，唔通佢哋咁斗膽醉酒駕駛？
政改晚宴後 反應慢亂噏嘢
前晚騸雞同阿基食完飯出嚟見記者，前者就問一句先答一句，反應遲鈍，而後者就講咩「如果阿媽話事，就阿媽做（特首選舉）提名委員會。」搞到大家聽到一頭霧水，懷疑佢哋唔知係咪飲大咗。
騸雞尋日就話，自己一滴酒都冇飲過，只係前日感冒同咳嗽，下午食咗藥，可能因為咁，反應慢咗啫。阿基就話自己淨係飲茶，佢嘅「阿媽論」係源於同場議員林大輝話「愛國愛港」等同「孝順」，要「阿媽」承認至得，佢覺得咁講即係篩選，先發火反駁喎。
政改飯局除咗有紅酒外，仲有五餸一湯加甜品生果，而飯後林鄭仲每人送咗樽XO醬添。有份出席飯局嘅議員盧偉國話，雖然菜式睇落係平實啲，但都幾好味，佢自己就零舍欣賞樽XO醬。
卓妮