中環出更：CY露兩手慶賀 港廚揚威國際
邊個話「廚房佬」一定冇出息？二十五名「本地薑」西廚去年十一月分別組隊遠赴瑞士及韓國，參加國際廚藝賽，雙雙勇奪全場總冠軍凱旋歸來。其中遠征瑞士巴塞爾嘅隊伍，更加係出戰六年一度、被譽為「廚藝界奧林匹克」嘅世界廚藝大賽，佢哋成功擊敗來自意大利、瑞士等九個國家及地區勁旅，難怪特首梁振英（CY）都大讚香港出產「世界級狀元」，仲罕有笠起廚師帽，同得獎西廚合作晒廚藝啦！
CY尋日獲負責領軍出賽嘅香港廚師協會邀請，為勇奪國際廚藝大賽冠軍嘅港產廚師隊擔任祝捷會嘉賓。出戰瑞士嘅隊伍憑着港人嘅靈活變通、縮減繁複工序，配合獨有嘅「香港速度」，成功喺限時內超額完成大會指定嘅奉餐數量，加上隊伍巧妙地將中式藥材南北杏融入雪糕，令外國評判刮目相看，成功過完一關又一關，贏得全場總冠軍。CY大讚佢哋嘅團隊精神造就今次出產「世界級狀元」，值得港人學習。
CY更應邀同得獎西廚合作下廚，佢罕有穿起圍裙、笠起廚師高帽，戴齊手套，合作炮製參賽隊伍嘅得獎前菜「紅菜頭醃三文魚」。不過，過程就好似兒童節目嘅廚藝環節咁，CY將由於時間關係、已經一早醃好嘅三文魚，不停重複鋪喺紅菜頭泡沫上，就大功告成可以款客，唔怪得CY忍唔住笑言「似做藝術工場多過廚師！」
嘉賓試食讚好味
CY罕有下廚，多位嘉賓紛紛畀面試食，工業界鍾志平、前民政事務局常任秘書長尤曾家麗試食後，都大讚好味。同CY下廚嘅兩位西廚亦大讚CY「夠細心」，做廚師絕對合格有餘喎。
卓妮