政情：葉劉騷「身家」 誘公記合作
最近新民黨與公民力量（公記）傳出「閃婚」消息，引起政壇唔少震盪，尋日新民黨主席葉劉淑儀同副主席田北辰殺入沙田，向十幾位公記成員簡介「合作計劃」。葉劉不斷騷「身家」，硬銷同新民黨合作有咩好處。包括大量資源支持區議員、新民黨智庫資料任用，又邀請公記成員加入新民黨，但強調唔會食咗公記呢個招牌，大家平起平坐喎！葉劉講到口水乾，最終公記會否講「我願意」，就要等待今周執委會決定。
殺入沙田 變身推銷員
據悉尋日會面氣氛良好，葉太好似變身推銷員咁硬銷同新民黨合作嘅好處。不過部分公記中人始終對呢宗「婚事」有保留，認為應該睇定啲先。支持合併嘅人就話，自從佢哋精神領袖劉江華加入政府後，公記群龍無首，變成一盤散沙，但公記成員個個都好打得又身經百戰，政圈上唔少政黨都諗住吸納呢隊新界東精兵，自由黨、經民聯都嘗試過，但最後佢哋選擇同葉劉合作，絕對係計過度過。