政情：中環出更：袁國強口花花 冧爆卿姐
律政司司長袁國強年近五十歲仍然單身，被喻為特區問責班子內最後一位「鑽石王老五」。尋日佢出席民主黨主席劉慧卿（卿姐）主持嘅網台節目，期間多次口花花話要含情脈脈望住卿姐，搞到同為單身貴族嘅卿姐冧爆，勁搞笑。
「我鍾意對住你含情脈脈」
話說袁國強執到四四正正行入卿姐嘅網台錄影室，佢同卿姐寒暄幾句坐低後，問卿姐要望住邊個鏡頭先得。卿姐就以一貫老定語氣教佢唔使刻意望住鏡頭，除非佢想「含情脈脈」咁對住啲網民講嘢喇！點知袁國強聽到卿姐咁講，好搞笑咁望住卿姐講咗一句：「我鍾意對住你含情脈脈多啲。」同樣單身嘅卿姐即時冧爆，仲笑到收唔到口，似乎對呢啲甜言蜜語相當受落。
政改諮詢正如火如荼進行中，政改三人組下周五將同民主黨會面，但就獨欠袁國強。卿姐喺節目結束後單刀直入問當事人：「點解你唔嚟呀？係咪唔畀面先？」袁國強遇到牙尖嘴利嘅卿姐，只能不斷重複自己唔係唔想出席，而係有其他活動所以去唔到，講到幾乎滴汗。
卓妮