政情：中環出更：拍住項明生 「進」入埃塞探險
深度式旅遊近年勁受歡迎，康泰旅行社董事總經理黃進達（Jason）睇準形勢，七月尾將拍住旅遊作家項明生（James）直闖非洲埃塞俄比亞，追溯五萬年前人類祖先係點樣生活。Jason唔係第一次去非洲玩，不過就從未去過埃塞。佢話，曾經去南非睇動物大遷徙，遇上成隻豹飛身跳上吉普車，驚險萬分，所以今次再訪非洲深入埃塞探險，好期待。
啱啱由北極返港嘅James，尋日着上有好特色嘅埃塞俄比亞土著衫現身，暢談當地風土人情。佢去年初已遊歷當地，係「超級地膽」，難怪太子爺Jason都話放心一齊探險。吹咗十五日大風雪返嚟嘅James，面色好似雪人咁白，講到此行難忘經歷，係人生首次見到北極光。James話，極光難求，由芬蘭追到去挪威，苦等六日都食白果，直至第七天早上佢去教堂祈禱完，夜晚果然見到七彩繽紛嘅北極光，開心到彈起。挪威雖然靚，但物價指數勁高，James話，當地一個漢堡包賣緊一百三十八港元，咬落啖啖都係血汗錢喎。
黃士心寫旅遊書上癮
講起新春旅遊團嘅報名情況，Jason都話喜出望外，預計整體客量有一成半增長，當中長線超豪團特別搶手，十幾萬元團費嘅南極、南美團依然好受歡迎。受惠日圓貶值，日本團人數勁升五成，但泰國線就受示威影響，少咗兩、三成人。Jason嘅爸爸黃士心都有到場，仲趁機推出第三本講述日本嘅旅遊書。佢話本書寫足一年，不過愈寫愈有癮，嚟緊將出埋台灣及韓國旅遊書，與大家分享旅遊點滴。
卓妮