政情:「貪」氏集團 醜盡2013

「貪曾」前特首曾蔭權爵士禍港七年後,已黯然下台逾一年,但剛過去嘅二○一三年貪腐指數依然處於高位,未有呈跌勢。貪腐風氣濃烈皆因貪曾一手提攜嘅兩位愛將、「貪湯」前廉政專員湯顯明及前政務司司長許仕仁(肥龍),先後因為酬酢風波同牽涉貪污指控,被廉政公署立案調查,「『貪』氏集團」下台咁耐竟然陰魂不散,就趁新一年為呢單政壇終極醜事回顧一下。

「假大空」政策 禍港至今

貪曾前年被東方報業集團圖文並茂踢爆「貪遍省港澳、歎盡海陸空」,證據確鑿,無可抵賴,其後又被揭瘋狂外訪兼豪花公帑入住酒店總統套房,雖然隨即被廉署立案調查,但調查至今依然冇下文。而貪曾治下七年嘅「假大空」政策更為禍至今,好似○三年建議收緊新來港人士申領綜援資格,早前被裁定違憲;由佢一手策動嘅十大基建、六大產業,都淪為禍港之策。

濫用公帑 毀廉署聲譽

上樑不正下樑歪,貪曾其身不正、貪威識食,連帶其他官員有樣學樣,好似其愛將貪湯,卸任後即先後被揭發連串貪腐劣行,包括任內濫用公帑豪飲、豪食、豪遊、豪送禮,令廉署多年辛苦建立嘅廉潔形象毀壞,更令香港嘅清廉指數跌至七年來新低。難怪立法會帳目委員會經調查後,罕有「痛斥」兼多番「譴責」貪湯,而貪湯就好似前老闆貪曾咁,變成過街老鼠。

欠債破產 貪字得個貧

至於已經年屆六十五歲嘅肥龍許仕仁,下台多年竟然被翻舊帳,上年遭廉署檢控貪污及公職人員行為失當,加上債務連連,半年內先後被五間金融機構入稟法庭追債,累積欠債估計近七千五百萬元,其後更正式被高等法院頒令破產,成為第一個破產嘅大紫荊勳章主人,每月逾八萬元長俸同個人財產都要用來還債。正所謂貪字得個貧,肥龍可謂經典例子。

趁新一年除舊迎新,望就望廉署公正及加快調查,以及作出進一步行動,為調低一四年貪腐指數出一分力。

第一手消息請下載on.cc東網iPhone/iPad/Android/Windows Phone Apps