政情：中環出更：家強申報 刪內地高球會籍
自從早前屢次發生官員及議員利益衝突或漏報風波之後，大家對利益申報嘅警覺性都提高咗。近月再有行政會議成員更新個人利益申報內容，其中財經事務及庫務局局長陳家強就刪除內地一個高爾夫球會嘅會籍，唔知因乜解究呢？
陳智思撈到去「山西」
陳家強近月更新嘅利益申報內容，刪去內地一個高爾夫球會會籍，一問之下，發現原來喺佢未做局長前已持有該會籍，以往不時會以波會友。不過，自從佢做咗局長之後，就再冇呢個閒情，亦好耐冇去過內地打波，所以預期每年都要申報，倒不如索性的起心肝整理好啲手續。雖然陳冇去打高球，但據聞不時都跑步健身。
另外，卓妮又發現行會非官守成員陳智思（Bernard）都有更新申報，同山西完全冇關嘅佢，最近竟然做咗香港山西商會榮譽會長。身為泰國華僑嘅Bernard話，呢個職務係受朋友邀請，希望香港、山西同東南亞以後有更緊密聯繫，所以掛個名囉。最近一個月，佢又做埋香港專業團體康體會名譽贊助人、香港校董學會榮譽會長，以及傳承學院顧問委員局委員等，真係百足咁多爪。
卓妮