大時大節當然普天同慶啦，可惜大時大節同樣危機四伏，甚至比起平時更加得人驚。大時大節可怕之處係好多人腎上腺素激增，繼而做出好多非理性嘅失控行為。正所謂咯喎，平安夜，失身夜，行為失控非理性嘅後果有機會「搞出人命」，無知少女大咗肚都唔知邊個經手。
更加可能搞出人命嘅係醉酒駕駛或者瘋狂飆車，就好似啱啱過去嘅聖誕前夕，平安夜對於一對富貴小夫妻而言絕對不平安，佢哋經歷過一場險過剃頭嘅恐怖車禍。
成件事係咁嘅，有一對家底豐厚嘅小夫妻，平安夜當日安頓好兩個寶貝仔女之後，拍拖去尖沙咀商場睇戲買禮物，凌晨時分開車返屋企啦，由於老公疲倦，老婆做司機。凌晨三點左右，太太所開嘅四驅車經尖山隧道出大圍青沙公路，路上出現由幾架辣車組成嘅車隊，以時速一百五十公里從旁呼嘯而過。
呼嘯而過嘅意思即係有人飆車啦，去到城門隧道路近大埔道大圍段快線，飆車黨其中一架跑車喺慢線爬頭，導致一架房車失控相撞，房車狂撼石壆爆胎，再反彈路中狂撼小夫妻所開嘅四驅車。慘遭橫禍嘅四驅車打白鴿轉撞壆，然後向右翻側，最得人驚嘅係汽車冒煙，隨時烈火焚身，車中兩人被困！
如果你係害人害己嘅飆車黨，你係咪應該第一時間救人吖？唔好意思，原來罪魁禍首係非常之咁無良兼冷血，佢哋推開阻路嘅車輛畀後面三架辣車通過，拆完車牌，執好物品，臨逃走前先至打開四驅車尾門，畀不斷拍窗求救嘅被困夫妻爬出。
呢個九死一生嘅故事話畀大家聽，警方如果唔嚴打飆車黨，所謂「路上零意外」只可能係天方夜譚。冇錯嘞，執法者必須認真執法，將所有非法賽車嘅冷血狂徒繩之以法，還道路使用者一個安全嘅駕駛環境，否則隨時死得人多。
假如捉到飆車黨，功夫茶強烈呼籲法官大人從嚴判決，釘牌嘅釘牌，收監嘅收監，萬一牽涉到人命傷亡，唔重判都冇天理啦！
汽車本來係方便快捷嘅交通工具，不過一旦落入行為失控非理性嘅人渣手上，汽車就會變成殺人兇器，甚至會出現連環兇殺案。所以咯喎，執法者係唔可以姑息飆車黨o架。過往有唔少案例，法官唔知點解咁仁慈，對於導致他人死亡嘅肇事司機往往從輕發落，完全收唔到阻嚇作用。計功夫茶話齋，司法機構人員不妨嘗試代入今次富貴小夫妻嘅角色，領略一下同死神擦身而過嘅感受，或者對於日後嚴懲瘋狂司機有幫助。