政情：政改頭炮釣大魚諮詢五大商會
政改諮詢為期五個月，政府近日已主動出擊，約見唔同團體收集意見，各個界別中，政府罕有地先諮詢商界團體。有工商界消息透露，政改三人小組嘅政務司司長林鄭月娥、律政司司長袁國強、政制及內地事務局局長譚志源將於一月七日齊齊出動，約見五大商會聽取政改意見。按諮詢策略來看，政府有意向較大機會支持政改向前邁進嘅團體埋手，為政改諮詢打頭陣造勢。
今次五大商會政改諮詢會預料會有四百多名代表出席。有商界人士形容，政府收集政改意見係其次，估計係想擺出一副重視商界嘅姿態，以獲取商界支持政改，所以一次過舉辦論壇諮詢晒五大商會。
呢五大商會除咗傳統四大商會，即香港總商會、中華總商會（中總）、工業總會（工總）及中華廠商聯合會（廠商會）外，仲有近年崛起嘅中華出入口商會（中出）。
料提及保留功能界別
我哋收到風，五大商會都想藉今次黃金機會向政府表達意見，工總主席劉展灝話，工總理事會曾經非正式探討過政改意見，初步總結兩大意見，一是希望保留立法會功能界別議席，以免削弱工商界嘅聲音。另一方面就係希望喺普選特首目標踏出第一步，即使只係一小步，也好過原地踏步，對香港整體發展百害而無一利。
總商會方面，據聞都想同政府力陳功能界別嘅重要性，擔心一旦取消功能界別，會令香港社會趨向民粹，平衡唔到商界聲音。而廠商會中人就話，佢哋傾向「先聆聽、後發表意見」，好想政府解釋一吓提名委員會嘅「民主程序」，到底有咩框框。至於中總同中出立場就比較保守，聽聞佢哋主力會表達政改要符合《基本法》，唔可以超越人大常委會決定等底線。
打破格局 「中出」成新貴
由於今次諮詢會係由五大商會合辦，過程中發生咗唔少插曲。首先係諮詢會嘅舉辦地方，因為各大商會都想喺自己「主場」舉行，以證商會地位得到認同。經過一輪「協商」後，最終決定喺港島香格里拉酒店舉行，咁就唔使順得哥情失嫂意喇。
第二段小插曲就係商會組合，話說政府無點名叫邊幾大商會出席，只係叫咗中總做拉線搵幾個商會聚一聚，結果唔止傳統四大商會，連 「中出」亦成為諮詢會嘅座上客，於是促成「五大商會」格局，睇嚟「四大商會」呢個名稱已成過去喇。